|
Kөç yağınnan әytűe tűgel. Kөç yağınnan bulsa, min berűzem yeğerme qıznıņ bөtenesen bergә, alar yanına Nail işerәk yuaş malaylarnı da quşıp, bәylәp salğan bulır idem. Şuqlığıbıznı yaratmıy ul bezneņ, uquğa kűņel birmisez, di. Uqıtuçılarnıņ qaysısı şayarıp utırğannı yarata inde? Tik alar klass citәkçese kebek űk teņkәgә timilәr, ximiә uqıtuçısı әnә bөtenlәy bәylәnep utırmıy, kűņelenә oşamağan eş eşlәsәk, kűzlegen maņğayına kűtәrep, ozaq qına qarap tora. Tәnәfes buluğa Zoya Mixaylovnanıņ kilep kerәsen şunnan belәseņ inde. Yarıy la çığıp kitәrgә өlgersәņ. Өlgermәsәņ, yanıņa uq kilep utıra da zıņğıldap torğan buş başıņa tırışa-tırışa aqıl tutırırğa kereşә. Dıņğıçlap tutırğaç, aqılıņ şundıy kűbәyep kitә, başıņnıņ sөyәklәre şıtırdap, tirese tartılıp awırta başlıy. Çığıp kitәse ide, baş sөyәge tűgel, arqa sөyәgen şıtırdatıp, malaylar belәn ber kөrәşep kerәse ide, dip astan ğına işekkә qarap utırasıņ. Belep torasıņ, Zoya Mixaylovna sine tiz genә ıçqındırmayaçaq, qotqarsa şul sanduğaç kűk sayrıy torğan ciz qıņğıraw ğına qotqaraçaq. Başqalar niçekter, alar turında әytә almıym. Aqıl digәn nәrsә alarnıņ başına da şundıy çitenlek belәn kerәme ikәn ul?
|